And in a launde, upon an hille of floures, Was set this noble goddesse Nature; Of braunches were hir halles and hir boures, Y-wrought after hir craft and hir mesure; Ne ther nas foul that cometh of engendrure, That they ne were prest in hir presence, To take hir doom and yeve hir audience. For this was on seynt Valentynes day, Whan every foul cometh ther to chese his make, Of every kinde, that men thenke may; And that so huge a noyse gan they make, That erthe and see, and tree, and every lake So ful was, that unnethe was ther space For me to stonde, so ful was al the place. And right as Aleyn, in the Pleynt of Kinde, Devyseth Nature of aray and face, In swich aray men mighten hir ther finde. This noble emperesse, ful of grace, Bad every foul to take his owne place, As they were wont alwey fro yeer to yere, Seynt Valentynes day, to stonden there. Geoffrey Chaucer, Parliament of Fowles, lines 302-322. From around 1380, this is one of the first associations of St Valentine's Day with a lovers' holiday.